Fréttir

Sr. Þorbjörn Hlynur Árnason ritar grein í Morgunblaðið í dag sem nefnist ,,Af hverju jáyrði við þjóðkirkju?" þar sem hann bendir á að ekki er verið að kjósa um samband ríkis og kirkju, heldur miklu fremur um samband kristni og þjóðar, þ.e. hvaða umgjörð við viljum hafa um hið trúarlega svið samfélagsins. Þá áréttar hann í greininni að þjóðkirkjan er sjálfstætt trúfélag en hvorki ríkiskirkja né stofnun. Grein hans er birt í heild sinni hér á glerarkirkja.is.

Þriðja tölublað Bjarma, tímarits um kristna trú er nú komið út. Meðal efnis er grein eftir Martin Saunders þar sem hann veltir fyrir sér hvaða áhrif bókin "Fimmtíu gráir skuggar" hafi á mat samfélagsins á kynlífi. Þá er að finna í blaðinu kynningu á starfi samtaka sem nota Biblíuna til að leiðbeina fólki í fjárhagsörðugleikum sem og ítarlega grein um trúarlegt baksvið 12 sporanna ásamt fjölda annarra góðra greina. Að sjálfsögðu er hið sívinsæla Bjarmabros líka til staðar.

Þriðjudaginn 16. október var komið að fermingarferðalagi númer tvö þetta haustið. Að þessu sinni tóku 27 krakkar úr Glerárskóla þátt. Lagt var af stað frá Glerárkirkju um hálf níuleytið að morgni dags og komið tæpum tólf tímum seinna til baka. Ekið var í Skagafjörð þar sem fyrst var komið við á Hólum í Hjaltadal áður en farið var á Löngumýri þar sem dvalið var við leik og störf. Með krökkunum í ferðinni voru sr. Gunnlaugur Garðarsson, sr. Guðmundur Guðmundsson sem nú leysir sr. Örnu Ýrr af og Pétur Björgvin djákni. Nokkrar myndir frá ferðinni eru nú aðgengilegar hér á vef Glerárkirkju.

Tæplega fjörtíu ungmenni sem öll eiga það sameiginlegt að ætla sér að fermast í Glerárkirkju í vor tóku í dag þátt í fræðslu og skemmtiferð sem kirkjan stóð fyrir. Farið var heim að Hólum og síðan dvalið dagpart á Löngumýri í Skagafirði en þar rekur Þjóðkirkjan fræðslusetur. Með í för voru sr. Gunnlaugur, sr. Arna Ýrr og Pétur Björgvin djákni. Langflestir krakkarnir í ferð dagsins eru nemendur í Giljaskóla. Hér á vefnum er hægt að skoða nokkrar myndir frá ferðinni.

Sr. María Ágústsdóttir verkefnastýra á Biskupsstofu er málshefjandi á öðru umræðukvöldi haustsins. Erindi hennar fjallar um texta biblíunnar og túlkun þeirra. Til grundvallar fræðslunni liggur bók Halvor Moxnes "Hvað er kristin trú?" sem kom út í íslenskri þýðingu Hreins S. Hákonarsonar hjá Skálholtsútgáfunni á síðasta ári. Það eru allir hjartanlega velkomnir í Glerárkirkju miðvikudagskvöldið 17. október kl. 20:00 til að hlýða á erindi sr. Maríu og taka þátt í samtali um efni kvöldsins.

Sr. Arna Ýrr Sigurðardóttir verður í námsleyfi frá störfum sínum sem prestur í Glerárkirkju frá þriðjudeginum 16. október til mánudagsins 19. nóvember. Sr. Guðmundur Guðmundsson mun leysa hana af á meðan, en sr. Guðmundur er mörgum sóknarbörnum vel kunnur þar sem hann hefur starfað um árabil sem héraðsprestur í prófastsdæminu og meðal annars verið einn umsjónarmanna með fræðslukvöldum í Glerárkirkju.

Heimsáskorun KFUM – 2012 „Skjótt´ á körfu” (e. „Hoop Springs Eternal“) fór fram í dag. Hún var skipulögð til þess að fagna starfi KFUM og KFUK um allan heim á sviði valdeflingar ungs fólks. KFUM og KFUK félög um allan heim skipulögðu viðburði þar sem þátttakendum og öllum sem vilja var boðið að skjóta á körfu. KFUM ætlar að setja nýtt heimsmet með því að safna saman fleira fólki en nokkurn tímann áður hefur verið gert til þess að skjóta á körfu í tilefni viðburðarins. Meðal þátttakenda á Íslandi voru unglingar úr UD-Glerá, sameiginlegu unglingastarfi KFUM og KFUK og Glerárkirkju. Myndir frá viðburðinum eru aðgengilegar á vefnum.

„Þjóðmálanefnd þjóðkirkjunnar hvetur fólk til að nýta kosningarétt sinn í ráðgefandi þjóðaratkvæðagreiðslu 20. október næstkomandi og íhuga tillögur stjórnlagaráðs í heild sinni og einstakar spurningar út frá kristnum grunngildum” segir í fréttatilkynningu frá Þjóðmálanefnd.

Fyrir síðustu helgi var safnaðarblaði Lögmannshlíðarsóknar dreift í öll hús í póstnúmerinu 603. Blaðið er nú einnig aðgengilegt hér á vef Glerárkirkju sem pdf-skjal. Ef einhver hefur ekki fengið blaðið er sá hinn sami beðinn að láta okkur vita í Glerárkirkju í síma 464 8800 og munum við koma blaðinu til skila um hæl. Næsta safnaðarblað kemur út í byrjun aðventu.

Nú standa yfir í Glerárkirkju fræðslukvöldin "Hvað er kristin trú?" Upptaka frá fyrsta kvöldinu, 10. október þar sem sr. Hreinn S. Hákonarson, þýðandi samnefndrar bókar eftir Halvor Moxnes flutti erindi um Jesú sögunnar og Krist trúarinnar. Erindið er birt í heild sinni á vefnum.