Hjónavígsla

Kirkjuleg hjónavígsla er helgiathöfn þar sem tveir einstaklingar heita hvort öðru ævitryggðum, að eiga, njóta og þiggja saman önn sem yndi lífsins, gleði og sorgir.

Hjónavígslan er tjáning gleði og fagnaðar, samstöðu, ábyrgðar og vonar á þessum vegamótum lífsins sem hjónin eru á. Söfnuðurinn umlykur hjónin fyrirbæn sinni ásamt kirkjunni allri og vill með Jesú Krist sem fyrirmynd sýna því samfélag hinnar gagnkvæmu þjónustu og þörf allra fyrir samfélag við Guð og náungann utan hrings fjölskyldunnar.

Návist Guðs í hjónabandinu veitir hjónunum hjálp til að lifa saman í kærleika og umhyggju og vera vottar þess í umhverfi sínu.

Hjónin játast hvort öðru opinberlega fyrir Guði og söfnuðinum, heita því að vera hvort öðru trú, elska og virða hvort annað. Guð sameinar þau, þau tvö verða eitt. Presturinn minnir þau á skuldbindingar og ábyrgð og fyrirheit hjónabandsins, og lýsir þau hjón og leggur blessun Guðs yfir hjúskap þeirra. Viðstaddir biðja fyrir þeim og heimili þeirra.

Hjúskaparsáttmálinn sjálfur er í eðli sínu veraldleg stofnun. Tveir einstaklingar sem heimild hafa til hjúskapar lýsa því yfir í áheyrn votta að þau vilji vera hjón og síðan handsala þau þennan sáttmála. Efnislega er enginn munur á þessu hvort sem um er að ræða borgaralegt brúðkaup eða kirkjulegt. Samkvæmt íslenskum lögum hjafa prestar og forstöðumenn safnaða heimild til að annast þennan borgaralega gjörning. Önnur sambúðarform eru einnig möguleg samkvæmt lögum, en kirkjan kemur ekki nema að þessari, og hefur heldur ekki lagalega heimild til þess. Önnur algeng heiti á hjónavígslu eru brúðkaup og gifting.

Það sem greinir kirkjulega hjónavígslu frá borgaralegri er fyrst og fremst ákveðin afstaða brúðhjónanna til kristinnar trúar . Þetta er kristin hjúskaparstofnun. Þessvegna verður amk annað brúðhjónanna að tilheyra Þjóðkirkjunni og gert er ráð fyrir því að ef hjónin eignast börn að þau verði alin upp í kristinni trú. Kirkjubrúðkaup er því grundvöllur að kristnu heimili.

Meginregla er að kirkjubrúðkaup fari fram í kirkju. Í það minnsta skulu vera viðstddir tveir vottar, eða svaramenn, en oftast eru það fleiri, úr söfnuðinum eða fjölskydum brúðhjónanna.

Heimild er fyrir því að giftingarathöfn geti farið fram á heimili eða utanhúss.

Þegar annað eða bæði hjónaefni hafa lögheimili erlendis þá gefa sýslumannsembættin út könnunarvottorð um hjúskaparskilyrði. Nánari upplýsingar um það er að finna á vefjum sýslumannsembættanna.

Í Lögmannshlíðarsókn eru tvær kirkjur: Lögmannshlíðarkirkja sem stendur nálægt veginum sem ekið er eftir upp í Hlíðarfjall og Glerárkirkja sem stendur við Bugðusíðu í Glerárhverfi (603 Akureyri). Þeim sem hafa hug á að ganga í hjúskap er velkomið að hafa samband við Hauk Þórðarson, umsjónarmann kirknanna í síma 464 8800 eða með netskeyti á haukur[hjá]glerarkirkja.is til að bóka kirkju eða fá að skoða aðstæður.

Aðeins er hægt að bóka Lögmannshlíðarkirkju frá maí og fram í september þar sem hún er lokuð yfir vetrartímann.

Öllum er velkomið að ganga í það heilaga í Glerárkirkju, hvort heldur þau eru búsett í sókninni eða annars staðar. Oft eru aðstæður fólks þannig að það velur prest til að annast athöfnina sem hefur tengst fjölskyldunni annars eða beggja brúðhjóna og er það að sjálfsögðu velkomið.

Prestar Glerárkirkju taka einnig gjarnan að sér að annast hjónavígslur í Glerárkirkju, Lögmannshlíðarkirkju eða annars staðar. Hægt er að smella hér til að sjá upplýsingar um starfandi presta við kirkjuna.