Fréttir

Á Kirkjuþingi haustið 2011 var samþykkt þingsályktun (21/2011) um stofnun æskulýðsnefndar þjóðkirkjunnar. Hlutverk hennar er fyrst og fremst að vera vettvangur fyrir umræðu um barna- og unglingastarf kirkjunnar um land allt, stöðu þess og þróun.

Páll postuli minnir okkur á að hugtakið náð felur í sér meira en aðgerðarlaust viðhorf eða afstöðu. Miklu fremur er náð kærleikur í verki. Við sem eru kristinnar trúar fáum að taka höndum saman til að byggja upp mannvænna, lífvænna samfélag. Sem ráðsmenn sköpunarinnar er okkur einnig falið að gæta sköpunarverksins.

Í vígsluprédikun sinni í dag sagði frú Agnes M. Sigurðardóttir m.a.: "Við erum ekki eyland. Við sem nú þjónum Kirkjunni byggjum á því sem var og mótum það sem verður. Verkefni okkar er því sístætt. Sem Kirkja höfum við þurft að horfast í augu við mörg lærdómsrík mál og búa þannig um hnúta að við getum horft björtum augum til framtíðar. Það starf hefur eflt okkur og þeir ferlar sem mótaðir hafa verið eru öðrum fordæmi í samfélaginu."

Kirkjuþing norsku kirkjunnar samþykkti í apríl 2011 að stórfjölga djáknastöðum. Stefnt er að því að árið 2015 verði að minnsta kosti einn djákni starfandi í hverju prófastsdæmi. Ekki er gert ráð fyrir því að sóknargjöldin standi ein undir þessari breytingu, heldur á að nota aðra fjármuni norsku kirkjunnar til þess að gera þessa breytingu að veruleika. Til lengri tíma er stefnt að því að hver sókn hafi sinn djákna. Á Íslandi er staðan önnur. Starfandi djáknar á landinu eru samtals 18 og dreifast þeir á 4 prófastsdæmi af 9 og þar af tæplega helmingur í safnaðarstarfi, hinir á stofnunum. Glerárkirkja er ein fárra kirkna með djákna í 100% starfshlutfalli.

Þeim sem fæddir eru 1999 og búa í sókninni barst nýverið boðsbréf frá æskulýðsstarfi Glerárkirkju þar sem sagt er frá ferð á Hólavatn um miðjan ágústmánuð fyrir verðandi fermingarbörn og aðra áhugasama einstaklinga úr 1999-árganginum. Ferðin er ekki formlegur hluti af fermingarfræðslunni en öllum úr árganginum er hjartanlega velkomið að koma með í ferðina, óháð því hvort þau séu að hugsa um að fermast eða ekki. Skráning er hafin á netfangið glerarkirkja@glerarkirkja.is.

Drög að nýrri stjórnarskrá og ráðgefandi þjóðaratkvæðagreiðsla var til umræðu á kirkjuráðsfundi þann 20. júní. Kirkjuráð samþykkti ályktun þar sem minnt er á hlutverk opinnar og rúmgóðrar þjóðkirkju sem stofnunar í samfélaginu og nauðsyn þess að sátt sé um hana sem aðrar grundvallarstofnanir menningar og samfélags.

Næstkomandi sunnudag, 24. júní, vígir Biskup Íslands, herra Karl Sigurbjörnsson, sr. Agnesi M. Sigurðardóttur. Viðstaddir verða biskupar frá öllum Norðurlöndunum auk fjögurra biskupa frá Bretlandseyjum. Athöfnin sem fer fram í Hallgrímskirkju á Skólavörðuholti í Reykjavík hefst kl. 14:00 og er öllum opin.

Í dag voru talin atkvæði í síðari umferð kosningar til embættis vígslubiskups á Hólum. Atkvæði féllu þannig að sr. Kristján Björnsson fékk 70 atkvæði og sr. Solveig Lára Guðmundsdóttir fékk 96 atkvæði.

Minnum á að foreldramorgnar eru á sínum stað í sumar: Alla fimmtudagsmorgna frá 10:00 til 12:00 í safnaðarsalnum. Heitt á könnunni.

Ráðstefna Sameinuðu þjóðanna um sjálfbæra þróun verður haldin í Rio de Janeiro í Brasilíu á sama stað og Jarðarfundurinn fyrir tuttugu árum og því hefur ráðstefnan fengið nafnið Ríó + 20. Ráðstefnan hefst á morgun, 20. júní. Til hliðar við hana sameinast fjöldi félagasamtaka um "The people summit", þar á meðal þróunarhjálp evangelísku kirkjunnar í Þýskalandi (EED).