Fréttir

Söfnun fyrir hjálparstarf kirkjunnar

Um þrjú þúsund fermingarbörn í 67 prestaköllum á öllu landinu munu ganga í hús í þessari viku og safna fé fyrir vatnsverkefni Hjálparstarfs kirkjunnar í Afríku. Við í Glerárkirkju hvetjum fermingarbörn vorsins 2012 til þess að taka þátt. Gengið verður í hús í Glerárhverfi fimmtudaginn 10. nóvember kl. 18.30 til 21:00, föstudaginn 11. nóvember kl. 18:30 til 21:00 og laugardaginn 12. nóvember kl. 11:00 til 16:00. Þau fermingarbörn sem vilja taka þátt eru beðin að mæta á fræðslustund um verkefnið fimmtudaginn 10. nóvember kl. 17:45. Foreldrar eru hvattir til þess að styðja við fermingarbörnin í þessu verkefni. Börnin ganga í hús tvö og tvö saman eða með foreldri. Hér á vefnum má skoða stutt kynningarmyndband.

Kompásnámskeið fyrir kennara

Glerárkirkja, í samstarfi við Skóladeild Akureyrarbæjar og Námsgagnastofnun stendur fyrir Kompásnámskeiði fyrir kennara á Akureyri haustið 2011. Hverjum grunnskóla er boðið að senda þrjá kennara á námskeiðið, en það hentar sérstaklega kennurum á unglingastigi. Skráning er hjá skólastjórum í viðkomandi skólum.

Tveggja manna tal um trú, þekkingu og heimspeki

Miðvikudagskvöldið 9. nóvember kl. 20:00 halda umræðukvöld prófastsdæmisins áfram hér í Glerárkirkju. Að þessu sinni snýst tveggja manna talið um trú, þekkingu og heimspeki. Þátttakendur eru sr. Gunnlaugur Garðarsson sóknarprestur í Glerárkirkju og dr. Hjalti Hugason, prófessor við guðfræði- og trúarbragðafræðideild HÍ. Að kaffihléi loknu eru almennar umræður. Allir velkomnir, aðgangur ókeypis. Sjá nánar á vef prófastsdæmisins.

Kompás í kirkjustarfi

Allt frá árinu 2006 hefur Glerárkirkja staðið fyrir ýmsum verkefnum sem tengjast mannréttindafræðslu, en það ár réð kirkjan Ölmu Guðnadóttur og Daníel Müller tímabundið til þess að fara í sjöundubekki í skólum bæjarins með mannréttindafræðslu. Verkefnin sem notuð voru, voru byggð á Kompás, handbók Evrópuráðsins í mannréttindafræðslu með ungu fólki. Á trú.is í dag má lesa pistil þessu tengdan, hann nefnist: Kompás í kirkjustarfi.

Allra heilagra messa sunnudaginn 6. nóvember

Á allra heilagra messu nk. sunnudag verður messa að venju kl. 11. Sr. Gunnlaugur Garðarsson þjónar, félagar úr Kór kirkjunnar leiða söng. Barnastarfið er á sama tíma í safnaðarheimili, sameiginlegt upphaf í messu. Allir velkomnir.

Landsmótið fer vel af stað

500 unglingar og leiðtogar eru samankomnir á landsmóti æskulýðsfélaga kirkjunnar sem var sett á Selfossi fyrr í kvöld. Karl Sigurbjörnsson, biskup Íslands, brá á leik við setningu landsmotsins og þakkaði unglingunum fyrir gott starf og góðan hug: „Nú veit ég af góðverkahelgi landsmótsins. Þar munuð þið leggja mikið af mörkum til þeirra sem treysta á aðstoð. Ég veit að hérna inni eru mörg gullhjörtu, sem bera umhyggju fyrir öðrum og láta gott af sér leiða.“' Meðal þátttakenda eru 12 ungmenni og 2 leiðtogar úr Glerárkirkju ásamt Pétri Björgvini djákna Glerárkirkju. Sjá nánar á kirkjan.is

15 manna hópur frá Glerárkirkju á landsmót

15 manna hópur leggur af stað í dag klukkan ellefu frá Glerárkirkju. Ferðinni er heitið á landsmót æskulýðsfélaga á Selfossi sem hefst í kvöld en alls er búist við um 500 þátttakendum. Undirbúningur hjá hópnum úr Glerárkirkju hefur staðið í nokkurn tíma, m.a. hafa tvær stúlkur úr hópnum æft stíft fyrir hæfileikakeppnina þar sem þær munu flytja söngatriði. Þá hittist hópurinn á dögunum til þess að sauma búninga, enda búningaball á dagskránni á laugardagskvöldinu og verðlaunum heitið fyrir flottustu búningana. Nokkrar mömmur og ein amma var fengin með í saumaskapinn og aldeilis glatt á hjalla. Skoða myndir frá búningasaumaskapnum.

,,Það er mikið mál að þrífa þessa kirkju

Það var um miðjan júlí í sumar. Þau komu göngumóð í Glerárkirkju, herra og frú Edge. Höfðu gengið alla leið frá Oddeyratanga. Þau voru farþegar á skemmtiferðaskipinu Aurora sem lá við bryggju. Það fyrsta sem hann sagði eftir að hafa heilsað mér var: ,,Það er mikið mál að þrífa þessa kirkju."

Pistlar um bænina: Erfiðleikar bænalífsins

Sr. Guðmundur Guðmundsson skrifar: Hvað er það sem gerir þér erfitt fyrir með bænina? Það má ekki fara fyrir okkur eins og fyrir manninum sem var að læra að hjóla í húsagarði. Hann sá stein á planinu og var svo upptekinn af því að hjóla ekki á hann að það endaði með því að hann rakst á steininn og féll um koll því að öll athygli hans var á vandamálinu. Vandinn er til að varast hann en listin að biðja er jafnvægislist sem við þurfum að ná tökum á. Lesa áfram á trú.is.

Tveggja manna tal um bókmenntir og listir

Þessar vikurnar standa yfir umræðukvöld í Glerárkirkju á vegum prófastsdæmisins um trúna á Krist, guðspjöllin og nútímann. Hvert umræðukvöld hefst á tveggja manna tali um ákveðið þema. Miðvikudagskvöldið 26. október er röðin komin að sr. Örnu Ýrr Sigurðardóttur og sr. Örnólfi Ólafssyni og ræða þau um bókmenntir og listir. Til grundvallar umræðunni er lögð bók páfa ,,Jesús frá Nasaret". Lesa nánar um fræðslukvöldin á vef prófastsdæmisins.