Fréttir

Fyrsta eldri borgara samvera vetrarins verður fimmtudaginn 19. september kl. 15. Gestur samverunnar verður Ragnheiður Sverrisdóttir, djákni, sem nýlega hóf störf í Glerárkirkju.

Fermingarbörn og foreldrar þeirra eru sérstaklega boðuð til messunnar á sunnudaginn kemur þann 15. september kl. 11. Að messu lokinni verður síðan stuttur upplýsingafundur fyrir foreldrana í safnaðarsal.

Minningarstund vegna fósturláta verður haldin í Höfðakapellu á Akureyri fimmtudaginn 12. september kl. 16.30. Minningarstundin er hugsuð til að koma til móts við þau ótalmörgu sem upplifað hafa sorg vegna fósturláts. Að stundinni lokinni verður gengið í nýjan fósturduftreit í kirkjugarðinum, þar sem hægt er að leggja blóm við minnisvarðann.

Nú hefjum við aftur vetrarstarfið og þá fyllist húsið af foreldrum og ungum börnum þeirra á fimmtudagsmorgnum kl. 10.

Fermingarbörn úr Giljaskóla dvöldu á Hólavatni í eina nótt um helgina. Veðrið var einstaklega gott og því var hægt að vera í leikjum úti. Leikurinn Stratego sló í gegn, setið var við arinn eld og sönvar sungir og frætt um forvitinn mann í Nýja testamentinu.

Í tilefni alþjóðlegs dags sjálfsvígsforvarna verður haldin kyrrðarstund í Glerárkirkju þriðjudaginn 10. september kl. 20:00. Sr. Arna Ýrr Sigurðardóttir leiðir stundina, aðstandandi segir frá reynslu sinni og Valmar Väljaots og Þórhildur Örvarsdóttir sjá um tónlistarflutning. Í lok athafnarinnar gefst kostur á að kveikja á kertum til minningar um þau sem fallið hafa fyrir eigin hendi. Eftir stundina verður kynning á starfi Samhygðar, samtaka um sorg og sorgarviðbrögð og LIFA, landsamtaka aðstandenda eftir sjálfsvíg.

Í næstu viku hefjast aftur æfingar Barna og æskulýðskórs Glerárkirkju. Dagný Halla Björnsdóttir hefur verið ráðin kórstjóri og Rósa Tómasdóttir verður áfram aðstoðarkórstjóri. Æfingar verða á miðvikudögum, yngri börnin, frá 2. - 5. bekk mæta kl. 16:30 og eldri börnin, 6. bekkur og upp úr, mæta kl. 17:15. Þátttaka í kórastarfinu er ókeypis. Allir sem hafa áhuga eru hvattir til að mæta og skrá sig á ofangreindum tímum miðvikudaginn 11. september

Nú fer fermingarfræðslan af stað í Glerárkirkju. Í þessari viku verða kynningarfundir, einn fyrir börn í hverjum skóla.

Kvenfélagið Baldursbrá heldur bingó í Safnaðarsal Glerárkirkju laugardaginn 7. september kl. 14. Góðir vinningar í boði. Allur ágóði rennur til líknarmála.

Nú um helgina dvöldu fermingarbörn úr Glerárskóla og Síðuskóla á Hólavatni ásamt leiðtogum úr UD-Glerá sameiginlegu unglingastarfi Glerárkirkju og KFUM og KFUK á Akureyri. Á föstudaginn kemur er svo röðin komin að krökkum úr Giljaskóla, en brottför er frá Glerárkirkju kl. 16:30 föstudaginn 6. september.