Fréttir

Nýbyggingaframkvæmdir við sumarbúðir KFUM og KFUK að Hólavatni eru nú á lokasprettinum fyrir sumarið. Í ágúst 2008 var tekin skóflustunga að nýju 210 fermetra húsi og nú tæpum fjórum árum seinna er draumurinn að verða að veruleika og í sumar munu börnin við Hólavatn fá að njóta þess að dvelja í nýjum herbergjum og eldri svefnaðstöðu hefur verið breytt í tómstundarými með borðtennisborði, fótboltaspili og fönduraðstöðu. Sjá nánar á kfum.is.

Sunnudagurinn 6. maí er fjórði sunnudagur eftir páska og ber hann nafnið Cantate sem þýðir söngur. Sr. Guðmundur Guðmundsson, héraðsprestur, mun leiða messu í Glerárkirkju kl. 11:00 þann dag og verður lofgjörðin og gleðin í fyrirrúmi í samræmi við þema og tilefni dagsins. Kór Glerárkirkju syngur undir stjórn Valmars Väljaots.

Karlakór Akureyrar-Geysir heldur vortónleika sína í Glerárkirkju, laugardaginn 5. maí og hefjast þeir kl. 15:00. Þar verða sungin lög úr öllum áttum, hefðbundin íslensk karlakóralög og erlend lög í bland. Fjórir einsöngvarar koma fram á tónleikunum auk þess sem KAG-kvartettinn tekur lagið. Stjórnandi er Valmar Väljaots. Miðaverð er 2.000 kr. Miðar eru seldir við innganginn.

Sunnudagskvöldið 6. maí kl. 20:00 heldur Gospelkór Akureyrar vortónleika sína í Glerárkirkju. Ljúfir tónar í bland við hressandi gospeltónlist! Allir eru hjartanlega velkomnir, við vonumst til að sjá sem flesta og eiga saman góða kvöldstund. Sérstakir gestir eru Rúnar Eff og Valmar Väljaots. Stjórnandi er Marína Ósk Þórólfsdóttir. Miðaverð er 1500 kr., 1000 kr. fyrir börn 12 ára og yngri. Miðar verða seldir við innganginn en einnig er hægt að kaupa miða í Pennanum. (Sjá einnig á Facebook)

Miðvikudagskvöldið 14. mars kl. 20:00 hélt sr. Arna Ýrr Sigurðardóttir erindi í safnaðarsal Glerárkirkju sem nefndist: ,,Æðruleysi í friðar og sáttarstarfi.” Dagskráin var hluti af umræðukvöldaröð Eyjafjarðar- og Þingeyjarprófastsdæmis og Glerárkirkju. Yfirskrift samræðukvöldanna á vorönn 2012 var VEGUR TRÚARINNAR. Þetta var sjötta kvöldið af átta. Markmið kvöldanna var að skapa vettvang til að ræða um andlegt líf og þýðingu þess fyrir trúað fólk, deila reynslu af vegferðinni og ræða saman um hana. Á vef prófastsdæmisins er nú að finna stutta samantekt frá kvöldinu og myndbönd með erindi sr. Örnu. Lesa meira...

Dr. Sigurður Pálsson er einn fremsti fræðimaður á Íslandi um trúarbragðafræðslu. Í grein sem birtist í Fréttablaðinu í gær og er nú birt á trú.is fjallar hann um mikilvægi fræðslunnar og um þá stefnumótun sem hefur farið fram á Evrópskum vettvangi. Lesa grein Sigurðar á trú.is.

,,Það er afar mikilvægt að gera sér grein fyrir því að guðsþjónusta safnaðarins á sunnudegi er kjarni alls félagsstarfs í kirkjunni” sagði sr. Bolli Pétur Bollason, sóknarprestur í Laufási m.a. í erindi sem hann flutti á fræðslukvöldi prófastsdæmisins í Glerárkirkju miðvikudagskvöldið 28. mars sl. Sjá nánar á vef prófastsdæmisins.

Nýverið flutti Sunna Dóra Möller erindi á fræðslukvöldi Eyjafjarðar- og Þingeyjarprófastsdæmis. Í máli sínu lagði hún áherslu á mikilvægi barna og unglingastarfs og sagði m.a.: ,,Þegar við gefum unga fólkinu hlutverk þá heldur kirkjan áfram að vaxa og dafna." Sjá nánar á vef prófastsdæmisins.

Í pistli á trú.is skrifar sr. Arna Ýrr m.a.: Við höfum líka upplifað gleðidaga. Gleðidaga eins og Mugison lýsir, með okkar nánustu, þar sem við upplifum að við tilheyrum, að við erum elskuð, að við erum dýrmæt. En okkur býðst líka að eiga annars konar gleðidaga. Gleðidaga sem við þurfum ekki að stinga af til að njóta. Lesa pistil á trú.is.

Leikmannastefna Þjóðkirkjunnar sem haldin var 13. – 14. apríl í Keflavíkurkirkju skoraði á Ögmund Jónasson, innanríkisráðherra, að beita sér fyrir leiðréttingu sóknargjalda. Ályktunin er birt á kirkjan.is.