Fréttir

Unglingastarfið hefur gengið vel í haust en að þessu sinni er Glerárkirkja í nánu samstarfi við KFUM og KFUK á Akureyri og ber starfið heitið UD-Glerá. 20, 30 og allt upp í 50 krakkar hafa verið að mæta á vikulega fundi unglingadeildarinnar sem haldnir eru í félagsheimili KFUM og KFUK í Sunnuhlíð á Akureyri. Úr þeim hópi fóru 20 krakkar í gistiferð á Hólavatn föstudagskvöldið 23. nóvember. Þrátt fyrir vetrarfærð og vetrarveður var það hin besta upplifun þar sem að ævintýraleikur úti í snjónum á föstudagskvöldinu og ganga á ísilögðu vatninu á laugardeginum áttu sinn þátt í að gera ferðina eftirminnilega.

Höskuldur Þórhallsson hélt erindi í Glerárkirkju í gærkvöldi, miðvikudagskvöldið 21. nóvember 2012. Erindið var hluti af fyrirlestraröð sem Eyjafjarðar- og Þingeyjarprófastsdæmi stendur fyrir í samstarfi við Glerárkirkju um kristna trú og byggist umræðan á bók Halvor Moxnes "Hvað er kristin trú?" sem kom út í íslenskri þýðingu sr. Hreins Hákonarsonar hjá Skálholtsútgáfunni árið 2010. Í erindi sínu brýndi Höskuldur kirkjuna: Það væri mikilvægt að kirkjan tæki virkan þátt í umræðunni í samfélaginu og við samfélagið. Hennar hlutverk væri þó ekki að koma með látum og upphrópunum inn í umræðuna, heldur ætti hún að einbeita sér að hógværum og umburðarlyndum málflutningi þar sem hún héldi fyrirgefningunni og hverjum þeim góða málstað sem Jesús Kristur stóð fyrir á lofti. Hætt væri við að kirkjunni yrði einfaldlega ýtt út af sjónarsviðinu ef hún drægi sig út úr umræðunni.

Fermingin er stór viðburður í lífi hvers einstaklings og fjölskyldu hans og skiljanlegt að margir vilji skipuleggja slíkar fjölskylduhátíðir með góðum fyrirvara. Það hefur verið okkur gleðiefni í Glerárkirkju í gegnum árin að allt að 97% barna úr hverjum árgangi hefur kosið að fermast í Glerárkirkju og vonumst við til þess að þegar kemur að börnum fæddum árið 2000 verði hlutfallið áfram hátt. Hér á eftir má sjá hvaða daga verður fermt í Glerárkirkju vorið 2014.

Sr. Hulda Hrönn M. Helgadóttir, sóknarprestur í Möðruvallaprestakalli, var fyrirlesari á fræðslukvöldi í Glerárkirkju 14. nóvember 2012. Hún nefndi erindi sitt "Sjálfsvirðing" og spurði m.a. í upphafi: "Hver er ég, hvert er samhengi mitt, hvað hefur áhrif á mig, hverjar eru fyrirmyndir mínar, hvað nema augu mín og eyru án þess að ég taki eftir því?" Hún benti á að allt væru þetta spurningar sem vert væri að skoða þegar kynin, einsetulíf, hjónaband og sjálfsvirðing væru hugleidd. Erindi hennar í heild sinni er birt hér á vefnum með aðstoð Youtube.

Fjöldi aðila á Akureyri, þar á meðal Jafnréttisstofa, Akureyrarbær, Aflið, Akureyrarkirkja, Amnesty, Glerárkirkja, Menntaskólinn á Akureyri, Háskólinn á Akureyri, Verkmenntaskólinn á Akureyri, Zonta konur og fleiri standa að dagskrá í tilefni af 16 daga átaki gegn kynbundnu ofbeldi. Dagskráin er að þessu sinni undir yfirskriftinni "Heimilisfriður - Heimsfriður". Boðið verður upp á kvikmyndasýningu í Sambíóum á Akureyri 27. nóvember, málþing á Amtsbókasafninu 29. nóvember, ljósagöngu frá Akureyrarkirkju 6. desember og mannréttindadag í versluninni Flóru 8. desember.

Frá októberbyrjun hafa staðið yfir umræðukvöld í Glerárkirkju undir yfirskriftinni "Hvað er kristin trú" á miðvikudagskvöldum kl. 20:00. Miðvikudagskvöldið 21. nóvember er komið að Höskuldi Þórhallssyni alþingismanni að vera frummælandi og er yfirskrift erindis hans "Kristin trú og stjórnmál". Sem fyrr byggir umræðan að hluta til á bókinn "Hvað er kristin trú?" en bókin er til sölu í kirkjunni á 3.000 krónur. Það er Eyjafjarðar- og Þingeyjarprófastsdæmi sem stendur fyrir þessum umræðukvöldum í samstarfi við Glerárkirkju.

Dagurinn í dag hefst í Glerárkirkju kl. 11:00 með messu og barnastarfi. Sameiginlegt upphaf í messu safnaðarins þar sem Kór Glerárkirkju leiðir almennan söng. Að því loknu ganga börn og þeir foreldrar sem kjósa í sunnudagaskólann í safnaðarsalnum. Þar verður fjölbreyttur söngur, sögur sagðar, horft á brúðuleikhús og fleira til gamans gert. Í kvöld kl. 20:00 er svo guðsþjónusta með Krossbandinu. Prestur dagsins er sr. Gunnlaugur Garðarsson.

Það verður sannkölluð kaffihúsa- og markaðsstemning í safnaðarsal Glerárkirkju í dag frá 14.00 til 17:00 en þá stendur kvenfélagið Baldursbrá fyrir tombólu og kökubasar. Fólk er hvatt til að mæta og styrkja fjáröflunar kvenfélagsins, njóta þeirrar lifandi tónlistar sem í boði verður og fá sér kaffi, heitt súkkulaði og eplaköku í kaffihúsahorninu. Þá verða kvenfélagskonur með ýmsan varning til sölu. Athugið enginn posi á staðnum.

Í tilefni Alþjóðadegi fórnarlamba umferðarslysa ætlar Rauði krossinn á Akureyri, Sjúkrahúsið á Akureyri og Félag slökkviliðsmanna á Akureyri að standa fyrir stuttri samveru í dag sunnudag kl 16.30 við þyrlupallinn hjá FSA. Tilgangurinn er að sýna samhug, minnast fórnarlamba umferðarslysa, kveikja kertaljós og hlusta á stutta hugvekju.

Gestur samverunnar verður Þórarinn Hannesson, forstöðumaður Ljóðaseturs Íslands og mun hann fjalla um málefni ljóðsins. Rúta fer frá Lindasíðu kl. 14:45 og kemur við á Dvalarheimil­inu Lögmannshlíð á leið til kirkjunnar. Að venju verður helgistund og kaffiveitingar.